Главна цел на програмата е учесниците да се стекнат со знаења и вештини од областа на графичкиот и веб дизајн.
Учесниците на оваа програма ќе се оспособат за самостојно користење на програмите за графички и веб дизајн. Ќе научат да изработуваат графички решенија за визит, карти, логоа,меморандуми, постери, флаери и друг рекламен материјал во печатена форма или во дигитална форма за социјалните мрежи. Ќе се оспособат да одржуваат веб страни: да додаваат, менуваат и бришат содржини, да додаваат и менуваат банери, да го менуваат изгледот на постоечката веб страна со цел да ја направат попрегледна и поатрактивна.
Програмата се реализира преку теоретска и практична настава при што акцентот е ставен на практичната обука.
Целата обука е конципирана како една сеопфатна практична работа во која учесниците освен што ќе се здобијат со теоретски знаења од областа на графичкиот и веб дизајн, практично ќе изработат голем број на графички решенија.
Времетраење на програмата е 140 часа: 64 часа се посветени на теоретска настава, 64 часа се практична обука, а 12 часа се посветени на оценување.
Целокупната обука (теоретската и практичната) ќе се одвива во компјутерска училница, која ќе биде опремена со компјутери и соодветни програми кои се потребни за следење на наставата.
Ќе се изработат голем број практични вежби осмислени за потребите на програмата.
Учесниците, цело време ќе работат практично.
Оценувањето и вреднувањето на постигнатиот успех на учесникот при неговото следење на програмата се спроведува преку проверка на знаење – усмено и писмено (на теоретскиот дел) и тестови со практични вежби кои се изработуваат директно на компјутер (на практичниот дел).
На крајот од обуката се спроведува завршен испит – кој исто така има теоретски и практичен дел и преку него се проверува комплетно стекнатото знаење и вештина на кандидатот.
По завршувања на програмата и положениот завршен испит, учесниците се стекнуваат со сертификат „ОПЕРАТОР ЗА ГРАФИЧКИ И ВЕБ ДИЗАЈН“.