Работилница за стратешко планирање на Центарот за доживотно учење

На 8-ми и 9-ти март директорката на Центарот за образование на возрасните, Линдита Ќазими, учествуваше на работилницата за организационо јакнење и стратешко планирање на активностите на Центарот за доживотно учење. Со цел да се постигне јасна цел за позицијата на Центарот во 2020 година, во рамките на работилницата беше анализиран целокупниот досегашен  развој на образованието на возрасни во Република Македонија и  улогата на DVV International, односно Центарот за доживотно учење, во истиот.  Во процесот на планирање на идните цели беа земени во предвид сите тековни трендови кои влијаат на образованието на возрасни во Република Македонија, како и идните планови и стратегии на национално ниво во оваа област.

Со цел да се утврди улогата на Центарот за доживотно учење, како еден од клучните партнери во целокупниот систем на развој на образованието на возрасни во Република Македонија, на работилницата учествуваа и други претставници од Центарот за образование на возрасните, како и претставник од Отворениот граѓански универзитет Јошка Свештарот од Струмица.

Работилницата ја водеше германскиот експерт Јохен Тепфер,а истата беше поддржана од страна на DVV International.

Свеченото доделување на сертификатите на 1000 градежни работници за енергетска ефикасност

Во рамките на ЕУ-иницијативата BUILD UP Skills (http://www.buildupskills.eu), која има за цел подобрување на квалификациите и вештините на европските градежни работници за постигнување на зголемена енергетска ефикасност на објекти, заврши спроведувањето на процесот на препознавање (верификација) на претходно знaење и вештини за енергетска ефикасност на градежните работници во Македонија за следните 5 занимања: фасадери, кровопокривачи, столари, инсталатери на греење, ладење и вентилација и инсталатери на електрични инсталации.

Иницијативата на Европската унија за градење на капацитетите на работниците во градежниот сектор беше со цел да се подготви и нашата земја во делот наквалификација и преквалификација на градежните работници, со акцент пријавување на кандидати кои поседуваат знаења и вештини стекнати со неформални обуки или работно искуство во градежни претпријатија. Токму поради тоа, во рамките на проектот „Обука на градежните работници за енергетска ефикасност“ – (BUILD UP Skills – Builders’ Energy Efficiency Training – BEET – http://beet.mk/mk/), заврши процесот на сертифицирани тренери и градежни работници, и со тоа се постигнаа целите од приоритетите  на ЕУ Стратегијата 2020 за спроведување на енергетската ефикасност во градежниот сектор.

Конзорциумот одговорен за имплементација на овој проект во Република Македонија е составен од: Стопанската комора на Македонија, како координатор на Проектот, Факултетот за електротехника и информациски технологии, ЈУ Центарот за образование за возрасни, Здружението на бизнис-консултанти „Креација“, Центарот за промоција на одржливи земјоделски практики и рурален развој – ЦеПроСАРД (Здружение на граѓани) и Факултетот за бизнис-економија од Скопје.

Свеченото доделување на сертификатите на 1000 градежни работници за енергетска ефикасност во 5 занимања, што ќе се одржи на 12 февруари 2016 година со почеток во 12:00 часот, во хотел Холидеј Инн Скопје.