Главна цел на програмата е учесникот да се стекне со знаења, вештини и способности од областа на работењето во хотелските објекти, техниката на работење на приемното одделение во објектите за сместување – рецепциската служба во сместувачките објекти и да се оспособат за нејзина практична примена.
Рецепционерот извршува работни активности во сместувачките објекти поврзани со прием, сместување и испраќање гости. Прима и реализира резервации за индивидуални гости и групи, калкулира и наплатува услуги. Во рамките на овие работни задачи, ракува со собните клучеви/картици, се грижи за багажот и вредните предмети на гостите и врши менувачки работи. Исто така, информира, советува и презентира угостителска понуда и услуги, резервира вонпансионски услуги во угостителскиот објект, подготвува различни видови прегледи и евиденции за тековното работење. Интегрира угостителски узанси во работењето, комуницира со гостите и деловните партнери на два светски јазици и решава конфликтни ситуации и тековни проблеми. Обезбедува и осигурува безбедни услови за работа. Работи самостојно на извршување на работните задачи, поседува претприемачки вештини и има способност за тимска работа.
